मराठी राजभाषा गौरव दिन सोहळा
शुक्रवार दिनांक: २७ फेब्रुवारी २०२६
मराठी साहित्यातील अष्टपैलू व्यक्तिमत्व, ‘कुसुमाग्रज’ तथा वि. वा. शिरवाडकर यांचा जन्मदिवस ‘मराठी राजभाषा गौरव दिन’ म्हणून साजरा केला जातो. आपल्या मातृभाषेचा वारसा पुढील पिढीपर्यंत पोहोचवणे, मराठी भाषेबद्दल विद्यार्थ्यांच्या मनात अभिमान जागृत करणे आणि वाचन-संस्कृती जोपासणे हे या कार्यक्रमाचे मुख्य उद्दिष्ट होते.
कार्यक्रमाची सुरुवात अतिशय मंगलमय वातावरणात झाली. शाळेच्या मुख्याध्यापिका देवरे मॅडम यांनी कविवर्य कुसुमाग्रज यांच्या प्रतिमेस पुष्पहार अर्पण करून पूजन केले. याप्रसंगी त्यांनी आपल्या प्रास्ताविक भाषणातून विद्यार्थ्यांना मराठी भाषेचा इतिहास सांगितला. मराठी ही केवळ भाषा नसून आपली संस्कृती आणि ओळख आहे, असे प्रतिपादन त्यांनी केले.
कार्यक्रमाचे मुख्य आकर्षण म्हणजे इयत्ता पहिली ते चौथीच्या चिमुकल्या विद्यार्थ्यांनी केलेले काव्यवाचन. विद्यार्थ्यांनी निसर्ग, आई,शाळा, आणि देशभक्तीपर कवितांचे सादरीकरण केले. या काव्यवाचनातून मराठी भाषेतील शब्दांचे सौंदर्य, लय आणि नादमाधुर्य स्पष्टपणे जाणवत होते. छोट्या विद्यार्थ्यांच्या सादरीकरणामुळे साहित्यातील गोडवा सर्व उपस्थितांच्या मनापर्यंत पोहोचला.
”या कार्यक्रमामुळे विद्यार्थ्यांमध्ये मातृभाषेप्रती स्वाभिमान जागृत होऊन, मराठी भाषेचे संवर्धन करण्याचा संकल्प दृढ झाला.”
